特首梁振英鍾意「調理農務」，唔少人都知，林鄭今日出席「欣賞香港」活動時，就親身示範如何「欣賞農務」。

林鄭今日出席「漁農美食迎春嘉年華」十周年慶典時話，呢個日子好值得紀念，希望表達對漁農業的欣賞，指嘉年華係個闔家歡聚活動，去年吸引咗18萬人進場。

梁振英過去曾指宗教界同體育界「無經濟貢獻」，引來業界人士不滿，林鄭今日就話，漁農業雖然只佔本地生產總值「不足百分之零點一」，但政府仍以為業界增值態度，不斷推動漁農業發展。

林鄭台上話希望大家今日「滿載而歸」後，就下台同食物及衛生局長高永文掃貨，食完車厘茄開胃後，就去鮮魚專門店買咗一條40元羅非魚，同一條30元的黃腳鱲，再用40元買咗2個紫心蕃薯，話做嚟煲蕃薯糖水，又去有機園公司買咗2盒有機士多啤梨、2包芽菜、1個木瓜、4盒菇及雪耳、8支甜粟，全程用咗545元至收手。

唔知係咪趕住返歸品嘗農作，林鄭掃完貨後無答記者問題，就上車運貨離開。