林家有喜事，林建岳7.1獲封金紫荊星章，更做埋阿公抱孫仔㖭，佢同前妻謝玲玲所生嘅寶貝女林恬兒，原來上個禮拜已順利生B，仲一索得男，可謂雙喜臨門。

恬兒已返家休養，專心坐月湊B，就連前兩晚佢都冇去阿妹心兒同孝能慶祝25歲嘅生日飯，五兄弟姊妹獨欠佢一個。

恬兒上個禮拜仲喺IG貼咗張佢同閨蜜曾昭亮嘅相，仲留言不能出席對方喺希臘婚禮，佢更用佢最愛嘅熊公仔emoji暗示自己有一個好好嘅理由，而昭亮亦回覆：「Iloveuuuumamabear!!Cantwaitcomebacktohkkktoseeyouuu」更貼上三個心形emoji恭喜。《蘋果》就打咗去恭喜玲玲榮升做婆婆，佢就笑笑口冇否認：「我有台灣朋友嚟咗，晏啲再打嚟。」

恬兒喺14年4月喺法國嫁畀全國政協何柱國兒子何正德，當時婚禮仲請到Coldplay主音ChrisMartin做嘉賓，相當架勢，之後一對新人5月中喺君悅補擺酒會，官商猛人齊嚟畀面，當中包括香港三代特首董建華、曾蔭權、梁振英、澳門二代特首何厚鏵同崔世安。佢兩個月前已經同一班閨密搞babyshower，全場擺滿藍色裝飾，仲將腹中BB叫「BabyBear」。