市建局今早繼續派人以木板圍封觀塘物華街市集，有未遷走的檔主不滿工人想將唯一搬運貨物的通道封閉，「變咗上親貨都要攞鎖匙」雙方一度衝突，工人報稱被檔主毆打，警員到場調停。

賣鞋的檔主陳先生指出，今早9時許有人圍封他的檔口，批評對方「黑心」，「唔明點解啲人咁緊張，封早一日同封遲一日有咩分別？我都係做到28號啫，清埋啲貨尾就走，宜家咁日日搞我哋，我哋點做生意」。

市建局企業傳訊總監邱松鶴表示，理解小販的疑慮，聲言已通知承辦商在達成共識前都不會動工。