市場不時聽到創新高，但間中都有業主肯平賣，太子別樹華軒就有一件，中層G，三百六十呎，作價百四萬，每呎三千八。利記馮樹勳話，折讓五巴仙。
舊年有四百幾宗登記嘅長沙灣泓景臺，原來一樣有平貨。利記曾建業話，七座極高層C，九百八十呎，以四百萬沽出，每呎四千一，低同類七巴仙。
不過，講到幅度，點都唔夠屯門居屋銀主盤勁，祥益邱家邦話，兆麟苑一座中層五室銀主盤，喺自由市場以八十六萬成交，七百一十呎，每呎千二，比市價低一成三。睇嚟想用一百幾十萬上車，要新界居屋至有多啲選擇，銀主盤就重抵。
邱家邦話，呢個月屯門居屋銀主成交，主要係龍門居，有啲呎價唔使一千，八座低層D，逾六百九十呎，作價近六十九萬，只係九百九十蚊一呎。

康豪苑梅開三度
舊年樓市暢旺，樓價急漲，製造好多轉手獲利機會，唔少重係屬於摸貨。一年可以轉幾次嘅成交唔算太多，主要係樓花或新入伙屋苑，但又一村康豪苑呢個冷門物業，估唔到都可以一年三度易主，不過，兩手業主就「同人唔同命」嘞。
中記余社朝話，單位係排屋，舊年三月成交價千八萬，到十一月以一千七百八十萬賣出，蝕咗二十萬。估唔到間屋近日畀個醫生睇中，以二千一百萬買入，賣方三個月賺三百二十萬，即一成八。
間排屋二千三百七十呎，有逾千呎花園同埋車位。