對上個禮拜，孫柏文同個好多年前喺老蘭𠝹過嘅女性朋友傾計。佢本身由當年fresh grad都已變某金融機構嘅marketing 阿姐級話事人，忽然問我：「妳有冇覺得我呢年變咗？」咁我就話佢好似冇咁衝、咁博，佢話啲朋友都係咁講。我話可能因佢老啦，所以啲賀爾蒙劇變。講完俾佢小。

散水後，我再諗，突然丁一聲寄短訊俾佢。佢其實當年佔中時，就有食過催淚彈、日日放工落金鐘、有錢捐錢、有水捐水嘅OL。我短訊中話：「其實，我都relax咗好多。心，平靜咗。見佔中唔work，連支持嘅曾俊華都輸埋，喺能力範圍內，都做盡，所以可疊埋心水。」

我睇自己未來，首先一定俾機會林鄭月娥。香港就算今日咁，都係世界最好，好難走，所以點都希望林鄭做得好。不過有更熾熱嘅心，呢幾年都冷卻。唔知呢排血庫冇血，係咪嗰個不可預見，香港人已唔care，真心公民社會崩潰嘅後果。

點都好，上週亦見兩樣嘢令我有新啟發。第一，就係我至喜愛嘅哲學家Nassim Taleb講全球民怨根源嘅文。第二，就係法國總統選舉結果。

Taleb話，全球民怨嘅根源，唔係因啲人好慘。而係你推嘅政策令佢慘，不過話事嗰班冇份受。香港最佳例子係TSA。試問有邊個高官，自己仔女要受？相信如果吳局長日日對住鏡頭話：「TSA好苦，我自己個孫都要受，我日日操佢操到我嘔。不過我哋始終要知邊間學校教得好，邊間唔得，喺唔可以再推小六學能測驗下，TSA要做。」民怨會低好多。真係搵現官員sell股票的話，港交所（388）死得。

而法國總統選舉，就係建制知道人民想造反，就不如造個聽建制話嘅「造反候選人」，去cap嗰浪民怨。香港原本有曾俊華，不過冇採用。點都好，加息浪，將會有歐央行加入聯儲局行列，大家小心。

孫柏文