回歸廿載，電影嘅發展起咗變化，由謀殺菲林到數碼化任拍嘅年代，劉青雲同林家棟都見證住，由視圈到影壇、從TVB到晉身影帝之路，見證住轉變。
回歸到那些年，電視人跳出框框，到影圈發展視為「升呢」，例子有梁朝偉、劉德華，到近年好似唔見有，有人覺得係視圈青黃不接，不過家棟又唔同睇法：「又覺得唔會，首先唔好理咩平台，作為演員係鍾意演戲，你能夠有成就，係天時地利人和，有冇一個劇本係你拿捏到，畀你好好發揮。」
有人覺得新一代藝人，撐唔起票房，搞到呢20年都係靠班「老鬼」孭數，家棟話票房好成敗劇本、導演同演員千百樣因素：「仲要上天嘅眷顧，先會有好成績。」

他認為80年代電影業出類拔萃，係因為產量多，人亦較多，機會自然增加：「依家(機會)係少，但唔代表冇，問題係你願意花幾多時間夠膽去冒呢個險。」家棟覺得電視依然能夠培養新一代電影人材，他話只要你有天資同特質，根本無人阻到你上位。青雲亦同意家棟嘅說法，他話以前只係得A、B揀，佢話：「以前得TVB同亞視，跟住就係拍電影，呢個年代唔同，演員可以拍劇、拍電影、拍網劇、真人騷，好多嘢可以畀你發揮，好似荷里活都係，電視劇比電影更厲害。」青雲喺97年演出過電影《一個字頭的誕生》、銀河的創業作品，佢話都係掹車邊兩位車邊。其實佢同杜、韋已經成為另一個「字頭」，青雲笑說：「嗰段時間，合作得最多係我啫，銀河主要係杜琪峯同韋家輝打造，我只係掹車邊影到幅相見到隻手啫。」至於有人對《一》片有唔同解讀，佢話都係各人嘅體會唔同。

採訪：黃曉妍
攝影：陳俊強