卓韻芝七年前疑因掛念亡母，情緒低落下，用紅酒送安眠藥，幸好鬼門關不接收，自此之後，阿芝開竅變得更愛惜生命。經常笑不停的她，本周四在伊館舉行「床上哈哈笑One Night Stand」棟篤笑，近日已閉關炮製重量級笑彈，顧名思義，這次以床做話題，她未開騷已解禁自爆床上秘密。
撰文：比華利

只消提到床，卓韻芝即陰陰嘴說：「一個人喺床上都可以哈哈笑，只要靠自己一雙手就可以找尋快樂。」她自爆對床的要求很簡單：「我瞓得着就得，我唔係咁着意瞓喺隔籬嗰個，對方扯鼻鼾冇問題，不過佢都要接受到我好反瞓，我瞓着會自自然然郁身郁勢，試過成個人醒後係調轉咗。我愛喺床上碌嚟碌去，或者我嚮往自由。」

事前冇準備

問到床上瘀爆事，阿芝尷尬地說：「我發現男人唔多在乎另一半係咪着咗一套好靚嘅內衣，我試過出動靚內衣，但佢一眼都冇望過我。」但她非常着重內衣：「內衣喺自己第一層，只要舊咗少少，我都丟咗佢，我買內衣捨得過買面衫。」偏偏另一半眼尾都不望，當然令她嬲爆。床上當然也有開心事，令阿芝樂透的卻非異性：「床上開心事唔係同男人一齊，有次我同個女仔朋友半夜3點幾，忽然好想食燒鵝，結果我哋坐車去旺角斬咗半隻返屋企，兩個女仔坐床扯嚟食。」
講起床事，阿芝越講越興奮，還百無禁忌說：「事前事後冇乜要準備，好多嘢突如其來，所有準備都會出錯，我習慣將預期降到最低。」阿芝深信沒期望便沒失望，她表示跟異性首次約會，不介意以真面目，甚至素顏示人：「再出去就慢慢扮靚，一次比一次靚多啲，對方會覺得我有改善，我唔想畀男方覺得入咗騙局，識另一半係啱性格，性格永遠抹唔甩。」

鍾情書獃子

早前阿芝身邊車輪轉是外籍猛男，可是近年裙下「乏」臣，她說：「𠵱家食齋，外國菜走晒，真係冇人追！可能男仔怕我窒，其實我唔寸嘴。我想拍拖，但唔會為拍拖而拍拖。」阿芝緊張事業，所以擇偶不必有錢：「要有才華，我鍾意少少書獃子氣息嘅男仔，要錢嘅話我自己可去賺，拍拖求開心。我又唔使靚仔，八両金唔得，我諗同佢傾唔到偈。」雖然思想開放，但阿芝堅持不會變攣：「我慾念上仲係俾男仔吸引，我係直嘅。」雖然朋友不停做媒，但事業已填滿阿芝的時間，令她充滿安全感。
髮型：Ziggie（Salon La Mod）
化妝：Micky Choy（such a good）
服裝：Dour Studio

蠢人是天敵

天不怕，地不怕，甚至連小強都不怕的卓韻芝，死穴竟然是蠢人，她皺晒眉頭說：「蠢人恐怖過奸人，奸人都有路畀你捉，佢哋雖然會濫殺無辜，但佢哋係有理智，小心啲可以避到，不過蠢人蠢起上嚟完全估佢唔到，蠢人蠢開有條路，真係嚇死你。」才女芝指蠢人沒分男女，她說：「只要係蠢，大學生可以蠢，亦冇分職業，高層、低層都可以蠢，蠢人又冇分男女。」她教路一旦遇上蠢人，千萬勿硬碰，否則必兩敗俱傷，她提議走為上着：「對付蠢人，唯一方法係微笑投降。」

逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！