今日年廿九，中港台三地藝人準備收爐送龍迎蛇。已嫁俾內地武指朱少杰嘅郭羨妮，去年生咗囡囡Kylie，不經不覺囡囡已經十個月大，Kylie愈來愈標緻可人，郭羨妮抱囡囡坐飛機返內地過年，雖然Kylie第一次坐飛機，但好乖冇扭計，令郭羨妮感安慰，佢喺微博話： 「又一年了﹗家豬小姐帶著媽媽，去跟爸爸一起過年，收紅包去，家豬小姐第一次坐飛機，很乖，媽媽很安慰。在這預祝各位朋友新年快樂﹑身體健康、心想事成﹗」

內地女星李冰冰鏡頭前優雅高貴，但鏡頭後就好賢淑，今朝佢喺微博放相，戴起膠手套準備為廚房大掃除，佢留言話： 「除舊迎新，喜唰唰喜唰唰！」 冰冰演戲叻就好多人都知，唔知佢做家頭細務又點呢？

Angelababy嘅「另一半」黃曉明，向來注重大時大節，尤其係農曆新年，佢話除夕夜習俗係蒸饅頭同包餃子，而黃媽媽一句話本命年要蒸個「蛇形饅頭」，呢句說話竟考起「海綿蛋糕」，佢立即於網上搜尋蛇形饅頭資料，好彩最後都俾佢搵到，曉明仲話細個原來食過兔子同刺蝟……饅頭呀，好彩佢講清楚，否則真係俾佢嚇親。

至於台灣女星林志玲姐姐，就以佢一向嬌嗲聲線，錄咗賀年短片：祝大家新一年事事順利﹑幸福滿滿﹑吃得好睡得飽﹗志玲姐姐仲呼籲大家一起做好事說好話，新一年大家很充實﹗大家聽到未？

早前因聲援《南方周末》編輯自主，而遭內地打壓的台灣女星伊能靜，心情似乎好番好多，唔再在微博抒發感受，只係放咗張扮「米妮」嘅相同大家拜年，好鬼嬌俏囉﹗而台灣人氣組合S.H.E亦放上合照，成員Ella話：「愛思考重環保新年好愛趣味心無畏無邊界一切順心如意又喜悅愛思.愛趣.一.祝福大家新年快樂。」

另外，除了中港台三地藝人外，種族屬印度嘅喬寶寶就扮財神同大家拜年，造型維肖維妙。