澳門逸園賽狗場結束營業，狗會於今年7月21日前要遷離，澳門賽狗場有逾600隻格力犬有待領養。今年1月，逸園賽狗公司執行董事梁安琪曾公開表示，若有狗主唔續養狗隻：「我梁安琪全部養晒。」但噚日佢回應時卻「縮沙」，指依家同政府探討狗隻安置問題，如果政府或者有地人士能夠提供場所，「有地方咪養囉！佢哋係生命嚟架，如果我冇地方點養呢？」

據知，唔少香港愛狗人仕都有意選擇領養這批格力犬，但有指香港漁護署狗房或已爆滿，預料年底先再可以收容隔離觀察嘅領養狗隻，狗主要自行付費租用澳門寵物店，待漁護署狗房有位先可以運到香港。

從事出入口狗隻多年、前SPCA 美容部主管丘碧瑜（Betty）小姐接受《蘋果》訪問，講到新狗主欲將狗隻由澳門運到香港，Betty表示全部都要喺漁護署隔離120日：「啲狗全部要隔離120日，政府狗房住宿費＄90一日，所以領養嘅朋友都要留意番。」

Betty又讚好多香港人都有愛心，但領養這類運動量較高嘅犬種，事先必須要考慮清楚。佢話：「本身格力犬係好溫純，但呢批狗始終受過訓練去比賽，例如會用電兔引發佢哋追捕嘅爆炸力，所以如果屋企有養兔仔呀、貓仔呀或者其他小動物都要留意，狗狗啱啱返新屋企嘅時候，最好唔好咁快同其他小動物一齊生活先。」

另外，出名係愛狗之人嘅何婉盈，多年來都收養過唔少犬隻。關於澳門逸園賽狗場結業，有多達600隻格力犬希望搵人收養，佢都有留意，但自己現階段就無法再收添新成員。何婉盈話：「睇到呢單新聞都好心痛，希望四太（梁安琪）真係出手相助喇！」

何婉盈又謂：「當然有地方畀啲待領養嘅狗邊住邊等係最好，但應該要同時聯絡世界各地嘅慈善機構，將呢個消息傳開去。當然做呢啲動作都要駛錢，但呢啲錢相信對四太嚟講唔係好多啫！」講到狗隻到港還要在漁護署住120日，每隻涉及萬多元，何婉盈嘆謂：「所以咪係囉，好多領養嘅人去到呢一步可能會卻步，如果四太可以全部負責晒，咁都可以吸引到多人領養啦！」

精選娛聞，喺晒《娛果》
http://fb.com/appledailyent