同伴侶走足75年，即係CrownWedding，超級品牌如法拉利、保時捷等相繼慶祝60周年紀念，日產今年仲威，踏入75年，絕對可喜可賀。但，香港只推出Serena75周年紀念版做壽，連旗艦GTR都無份，點解？一如品牌既有印象，夠平民化囉。

記者：梁美甜
攝影：林栢鈞

白色尾燈夠搶

日產車系中，Serena性能唔及GTR咁強悍，外形唔及Tiida咁流線好玩，豪華感亦唔及Elgrand咁Grand，咁，點解日產會趁75大壽推出Serena75周年紀念版呢？好簡單，夠代表性囉；廿萬多啲車價夠抵玩、夠環保、實用性高，平民親民，普羅大眾都供得起，呢啲咪賣點囉。紀念版Serena加強咗啲乜？加裝大包圍頭尾泵把、裙側同尾翼，兼換上超型白光尾燈，相對於平平凡凡一街都係嘅紅色尾燈，具立體感嘅一排式白色尾燈無疑更搶眼突出，令原本已帶跑味嘅Serena充份散發運動氣息，成架車望落去，更具肌肉感。

開揚通透

MPV車款不嬲受市場歡迎，尤其係中低價車，鍾意操控性嘅偏向揀低身車型，好似Odyssey、Mazda8、Stream等等，偏向高身兼內櫳闊落開揚嘅就只剩Stepwgn同Serena兩款。作為日產70周年紀念版嘅Serena，過人之處在於內櫳空間感同操控性都強，雙天窗雖唔及Stepwgn嘅和風式六格天窗，但全車幅幅都係大窗，加埋低腰線設計，整體開揚得嚇人，夠晒通透，諗住帶女友上飛鵝山搞三搞四，建議唔好囉。論私隱度，好低；論開揚舒服，我畀滿分。

內櫳闊落

Serena不嬲係大熱車款，就連政府都入咗唔少貨，Offer畀唔同部門使用。優點？我認為一，2.0CVTC環保引擎搭配XTRONICCVT波箱，慳油夠力；二，車身腰線高、車窗大兼有雙天窗，空間感大到唔信；三，三排七、八座位變化大，實用性強，摺叠平放挨挨碰碰瞓到幾個人，心血來潮上山下海踩單車滑浪，都放得落幾部單車同幾塊滑浪板；四，最緊要係，人坐得舒舒服服，配有防水質料座椅，上完山下完海，都唔怕人或器材用品整濕座椅，揸嗰個放心坐嗰個安心。

a.加尾翼，令人感覺部車好跑得。

b.尾燈用上白光燈，夠Sharp。

c.加尾泵把，令車身更具紮實感。

d.加大包圍，感覺更惡死。

e.加裙側，令車側更流線型。

f. 單邊摺叠式座椅，可以放幾塊滑浪板喇。

g. 平放中、後排，至啱開完夜攤唞眠一眠。

h. 揭起地台有儲物位，放完手提行李仲有位，擺個生日蛋糕，製造Surprise都仲得呀。

i. 車廂備Ion空氣淨化冷氣系統，鼻敏感都無有怕。

j. 駕駛席夠空間，唔會太過頂頭頂腳，頭頂醒多你一個天窗，感覺更開揚。

k. 前排椅背備有小餐桌，方便小朋友開餐。

l. ParkingSensor連Camera，泊車睇位好幫手，新手揸車都唔使驚。

m. 中控台同軚環設計，同上一代相若。

NissanSerena規格

引擎：1,997cc，直四CVTC
馬力：137ps/5,200rpm
扭力：20.4kgm/4,400rpm
傳動：XTRONICCVT無段變速
車價：待定
查詢：合誠汽車（23688235）