10多年前一套馬景濤、周海媚、葉童所主演嘅《倚天屠龍記》，令到筆者首次追看金庸系列小說，還記得一晚睇了一本半厚裝小說搞到生「眼挑針」，看畢小說就知道電視劇改到有幾離譜，所以一直有心願可以睇到跟原著拍到一模一樣的電視劇。事隔多年，金庸小說已經「翻煲」10多次，其間依然有不少電視台拍攝金庸作品，往往改得最過份的都一定係台灣電視劇，當中的人物性格可以完全與原著不同！既然編劇有本事改變金庸先生的創作，倒不如自己重新寫本小說，何須欺世盜名呢？

談回本地金庸創作，近年來最有印象一定係年過40的「程志美」醫生──吳啓華所扮演的張無忌，最經典一定係少年無忌──鄧一君一夜間變成「程志美」……真係好頂癮！直到近年內地電視劇打入香港，終於可以接觸到內地製片人張紀中的金庸劇。筆者的最愛就是李亞鵬及周迅的《射鵰英雄傳》，選角方面絕對首屈一指，周迅絕對是繼翁美玲後做得最好的黃蓉！多得張紀中對於金庸劇的執着。新近無綫播映的《神鵰俠侶》選角都相當不錯，香港人都非常受落，每日搭巴士都有小朋友不斷叫「姑姑！」的確係近年來少見的現象。而且忠於原著的劇情的確令金庸Fans感動，雖然劉亦菲同黃聖依相似度有90%，不過小龍女一角就演得非常唔錯。剛剛知道張紀中未來會開拍《碧血劍》及《鹿鼎記》，真令到筆者翹首以待呢！