馬季雖然開始了僅短短兩星期,但已經有唔少馬跑過兩次甚至三次。當中蘇偉賢馬房「鴻圖戰士」三日前剛啱禮拜三晚至由史卓豐跑過谷草,當晚12檔起步沿途望空兼墮後,表現好平淡。
不過熱完身開咗氣,「鴻圖戰士」這天轉嚟田草,跑第五場四班草地千二米,配搭轉咗羅理雅,抽五檔起步,表現卻唔同晒,早段貼欄守好位一步冇蝕,直路順勢抄出中叠一衝過晒,連續第二季有馬贏,12倍綠燈win得手,不過條Q落飛黨贏得更誇張,事關大熱門最輕磅之「翡翠紅星」配霍勵賢,觸線前及時趕過雷神座騎「好好分」跑第二,由1羅理雅、霍勵賢呢兩位二線洋將構成之13倍啡燈Q,落飛黨押下注碼有90萬,扣本後此條連贏位進賬約1,200萬。
此場「好好分」臨尾力弱,叫做頂番個第三有交代,第四名是續配蔣嘉琦匆出之呂廐熱門「尊皇速龍」,四重彩派一萬六千幾。