中國風電（182）業績靚爆鏡，預期PE得6倍單位數，集團又受惠多重國策，前途無可限量，要買。中國風電主打祖國風力發電業務，呢期啱啱公佈09年半年度（9月底止）業績，純利飆升咗1.9倍到5385萬銀。要咁睇，阿爺為持續推動環保，最近對風電企業推出三免三減半嘅稅務優惠，中國風電已經食住環保國策。
又金融海嘯底下，阿爺亦推出4萬億銀谷內需措施，當中，環保基礎建設又係受惠一員。中國風電喺咁嘅優勢之下，真係長做長有。保守計數，集團09年度純利只係升1倍到兩億銀，預期PE得6倍。再講，中國風電手頭淨現金3億銀，財務狀況又靚靚仔仔，現價（0.202元）P/B亦係得0.6倍咁大把。內地同類股，家陣平均P/B仲喺1倍樓上。買中國風電，上番NAV計，現價要升65%到0.335元，到時，集團預期PE都係啱啱好到10倍，仍然好抵買。

五礦建設博升五成

五礦系有五礦建設（230）及五礦資源（1208）。後邊五礦資源市值18.2億銀，五礦建設得6億銀。要咁睇，五礦資源對上一兩年，獲阿媽悉心栽培做鋁業旗艦，市值及業務晒士得以壯大。
啱啱喺上個月，五礦建設宣佈，獲阿媽注資內房相關業務，集團既奠定為五礦系內房上市旗艦，隨住注資逐步落實，五礦建設市值晒士又唔係再咁細奀。呢轉冷吼，博五礦建設上番9月橫行位0.88元，現價潛在升幅近5成，屆時仲未上到NAV水位。
錢雋