九廣鐵路前兩年開多咗個尖東站，其實九鐵早喺1915年已經直達尖沙嘴，只不過舊火車站拆咗，𠵱家喺尖沙嘴海旁嘅鐘樓，就係舊火車站嘅遺蹟。呢個尖沙嘴火車總站喺1916年3月28日先正式落成，興建過程好運滯，1913年開始興建時，因為發生第一次世界大戰，好多由英國訂番嚟嘅裝置同器材運唔到來港，拖咗好耐，搞到1916年先落成。
由於工程安排亂晒龍，鐘樓裏面個成噸重嘅鐘，更要拖到1920年先安裝，之前個鐘樓係「流」嘢得個殼，無鐘嘅。因為要讓路尖沙嘴發展，總站喺1978年搬去紅磡，尖沙嘴站拆剩個鐘樓，同埋部份半園形嘅古羅馬支柱同頂橋，大家總算有得緬懷吓。