收到風，不嬲鍾意唱歌嘅紅魔「新兵」泰維斯準備出唱片。佢嘅歌聲好唔好聽，或者歌路係咪大眾化，我求大俠唔敢講，只希望佢隻碟可以幫到球會；事關曼聯最近至叫重返勝軌，家陣仲有傳球會爭落一大堆街數。𠵱家球會處於存亡之秋，唔知費Sir會唔會同其他老將，拍住泰維斯唱好曼聯呢？
唔講唔知，「野獸」泰維斯原來多才多藝，話說佢同阿哥加埋幾兜友，合組成一支PiolaVago樂隊，而且兩年前仲出咗張收錄咗13首歌嘅唱片，當中逾半係泰維斯自己作曲，據聞喺阿根廷仲賣到3萬張咁多。
家陣泰維斯唔知係咪mood到，又話想推出第2張唱片，不過今次就唔係自己作曲作詞，而係唱啲隊友最鍾意嘅「口水歌」；識得同隊友打成一片，果然係世界仔。想聽泰維斯啲歌，英國《太陽報》有得聽，趁早click入 http://www.thesun.co.uk/article/0 ,,4-2007410970,00.html啦。

傳曼聯唔掂隨時賣盤

我求大俠就覺得費Sir應該親身支持，兼且叫班球員唱埋一份。點解？Jam歌聯誼點都好過好似基斯坦奴朗拿度「嗌外賣」、開派對嚟得健康啩！仲有，當年曼聯老闆格拉沙左借右挖先至湊夠錢買起隊波，早前就傳出佢淨係今年借貸嘅利息都成1億鎊（約15.8億港元），你都咪話唔得人驚！好多曼聯球迷就擔心呢個計時炸彈隨時爆，而格拉沙隨時將間球會變賣還債。希望泰維斯今次搞一搞，可以唱好曼聯，令紅魔躉暫時忘憂啦！