每年維園花卉展開幕，特首夫人按慣例都出席賞吓花。不過，特首林鄭月娥上任後，老公林兆波例牌唔出席呢類畀面派對。娥特噚日惟有代夫出征，笑笑口話自己「成功爭取」做花展嘅主禮嘉賓喎。娥特又透露，自己唔鍾意燦爛奪目嘅花，最鍾意桂花同鉸剪蘭，桂花嘅清香陪伴佢度過艱難日子。唔知林兆波聽完呢番話，下年情人節又會送咩花呢？

網民：仲有心情賞花

娥特做咗特首9個月，佢話好榮幸入住禮賓府，嗰度有盛開嘅杜鵑。咁又係，娥特用咗差唔多900萬公帑裝修禮賓府，其中98萬將網球場改裝成為休憩空間，種吓花花草草，想唔靚都難喇。而聽日就係一年一度嘅禮賓府開放日，如果市民想睇吓裝修完嘅禮賓府有幾靚，可以聽日朝早10點至下午5點去參觀。
噚日花卉展除咗港姐同娥特，仲有好多中小學生即席寫生㖭。娥特就話希望同市民同憂、同樂，除咗呼籲大家去花卉展「打卡」，自己都喺facebook打卡留倩影。
不過網民就唔多賞面，有人質疑香港咁多問題未解決，點解娥特仲有心情賞花；有人希望政府派錢，市民就最開心。