【機場】陳小春前晚喺台灣林口體育館開演唱會，雖然台灣網民到場贈興叫佢「滾出台灣」，但無損心情，小春仲即場宣佈老婆應采兒懷孕三個月。噚日傍晚6點幾，着住鬆身衫嘅應采兒，一個人帶住囝囝Jasper返港，未見小春同行，不過佢就全程迴避記者提問。

掛便攜式清新機

戴住口罩、身穿粉紅色衞衣嘅應采兒，噚日拖住Jasper現身香港機場，見佢一手推篋，另一隻手就拖實囝囝，而佢哋身上都掛住便攜式空氣清新機。雖然已經懷孕三個月，但應采兒一向纖瘦，仍未見肚。問到小春係咪一齊返港時，應采兒冇回應，之後恭喜再陀B，佢都只係笑一笑。問到小春前晚開騷時，會場外有人示威，問佢驚唔驚？應采兒依然冇答，反而Jasper就全程跳跳紮，仲興奮到跳舞。提到小春喺區議會選舉日，喺票站違法影選票，應采兒繼續耷低頭，然後同囝囝上七人車離開。

前晚小春喺台灣騷上，唱到《獨家記憶》前突然感性話：「你們也要恭喜我，我有第二個孩子了，只是我還不知道是男是女，今天剛好是三個月，謝謝我老婆。」當時喺現場嘅應采兒，就開心摸肚回應。
撰文：馮仁昭