提起體型細小嘅青蛙，小記當然會諗起本港特有嘅盧文氏小樹蛙(Liuixalus romeri)，有住喺大埔嘅讀者區小姐，6月19日晚(周二)喺屋企嘅花園，發現一隻體型非常細小嘅青蛙，「係個仔見到先，細到睇唔清楚。」

「細到隻蚊咁真係未見過。」區小姐係第一次見到咁細隻嘅青蛙，好奇之下就將佢帶咗返屋企，仲用個玻璃樽養住，區小姐連續兩晚觀察，隻青蛙一樣會彈彈跳，但係就唔會叫，區小姐度過，隻蛙只有5毫米長，細過塊指甲，「係咪咩品種？」。區小姐仲好有心機，將青苔同泥土放入樽，仲會噴濕啲泥，營造一個類似大自然嘅環境畀隻蛙生活。

小記去咗區小姐屋企睇過，原來隻蛙嘅頭係金色，身上仲有斑紋，因為連魚糧都大粒過佢，區小姐喺花園捉咗幾隻蟻放入玻璃樽，隻蛙就開餐喇！雖然睇唔出佢嘅品種，但小記就覺得唔似盧文氏小樹蛙。

區小姐囝囝謙謙話，當日見到隻蛙跳來跳去，「好得意，媽咪話係蜘蛛，我話係青蛙嚟嘅。」，5歲嘅謙謙話，唔想隻蛙變到太大隻，「大隻嘅話會嚇親我㗎。」仲話想搵多幾隻，等隻蛙有多啲朋友。

小記將啲相畀咗蛙類專家劉惠寧睇過，原來區小姐擺咗烏龍，佢執返嚟嘅並唔係青蛙，而係蟾，劉惠寧話，呢隻係岩岩由卵孵化而成嘅「溫室蟾」（greenhouse frog），來自中美洲，屬於入侵品種，以食螞蟻為生，溫室蟾同一般嘅蟾蜍唔同，唔需要喺水中產卵，而且亦唔會經過蝌蚪期，繁殖力超強，劉惠寧話雖然溫室蟾無毒，但都唔建議市民將野生動物帶返屋企養。

你敢爆，我敢獎！ 即Call《蘋果》24小時爆相爆片熱線 ：63836568