湯洛雯、上山詩鈉囡囡Hilary同關禮傑女兒關楓馨今日喺銅鑼灣出席活動，聖誕節將至，單身嘅湯洛雯話唔感到孤單，因為朋友已約咗佢去開party：「有次喺朋友婚禮介紹男仔我識，其實我唔係咁飢渴，佢哋話急過我。」佢話再拍拖時會視對方為結婚對象，所以要認真選擇。

有傳黃子恆勾搭fans搞大對方個肚（新聞連結： https://bit.ly/2Qya8Cu ），湯洛雯現同黃子恆拍同一劇，但湯洛雯話大家少對手戲：「我冇細睇段新聞，唔係太知發生乜事，但佢個人好nice，工作好專業，佢嘅私事唔了解，唔方便回應。」湯洛雯話二人傾偈少講感情事，而自己嘅fans多數女仔，有啲都熟絡兼有自己聯絡電話，冇刻意同fans保持距離。

另外，剛喺英國讀書回港嘅關楓馨，o依家同男友分隔兩地，自己暫時未有去向，打算做教育或同小朋友有關嘅工作。有傳無綫有意同佢簽約，關楓馨否認話：「唔係，呢啲只係傳聞。」佢未有決定會否入娛樂圈，若有機會都有興趣試。

精選娛聞，喺晒《娛果》
http://fb.com/appledailyent