王征入稟高院申清亞視清盤，而法庭就委任咗德勤會計師事務所為臨時清盤人，正式清盤令聆訊已排期至4月13日進行。日前本報都報道過話亞視決定解僱九成員工，只留低幾名「必須」員工負責亞視大樓保安同播放影片工作同埋大樓保安，而之前復播嘅新聞會再度停播，咁樣就可以令亞視開支唔使咁大，夠錢向呢幾名員工出糧。

今朝亞視突然宣佈下晝3點召開員工大會，有傳亞視會解散所有員工，有傳話喺員工大會會宣佈解散整體員工。見慣風浪嘅亞視員工，今朝仲係如常咁返工，新聞部亦會採訪車出出入入，股東代表何子慧亦都坐住新股東司榮彬平時坐嗰架黑色七人車返咗亞視。至下午近3時，德勤中國華南區主管合夥人黎嘉恩坐住一架印有「德勤」字樣嘅車抵達亞視，未有接受訪問。

《蘋果》記者今日聯絡亞視新投資者司榮彬，問佢係咪今日炒晒亞視員工，佢就透過微信話:「請問德勤和債權人王征。我們希望重組亞視，並直接發薪留一部份員工維持亞洲電視正常運轉，但都要臨時清盤人德勤、債權人王征認可、法院申批！」

德勤對亞視進行重組還是清盤，成為可否申領破欠關鍵。只有清盤員工才可以申領破欠，否則仍是遲遲未能取回欠薪補償。