股海實戰錄:窩輪發揮利好作用

蘋果日報 2002/02/19 00:00


美股周一放假,好友唔肯認輸。恒指噚日走勢相當靚,倒升40點收市,兼重返萬一點之上,可惜成交只有62.8億元,稍嫌買盤動力不足。
其實噚日市場冇乜特別利好消息,中資股炒高只係舊聞新炒,再傳中國會減息。地產股造好都叫有啲道理,因為賣樓去貨速度唔錯。
趙飛雲觀察所得,近期有份出輪嘅大藍籌及中資股普遍走勢唔錯,正浮現發輪效應,至於形勢偏好當然同Call輪多過Put輪有關。由此推測,發行商要散貨,點都唔會畀個市大散,最多係跌吓升吓,而且咁樣更吸引散戶入市,幫助去貨。

9030數據似末日輪
滙豐(005)噚日表現較失色,跌0.25元,收89元。滙豐Call輪9030溢價2.88%,槓桿比率10.85倍,重有近半年期,但數據就成隻末日輪咁款,有咁大隻蛤乸隨街跳,梗係同滙豐業績被睇淡有關。此外,溢價低可能已預計埋派息因素,實際應該唔係咁低。不過點計9030都係平,如果滙豐業績唔係市場預期咁差,有機會險中求勝。當然,以現水平計,滙豐Put輪勝算自然高啲。