官恩娜（Ella）在爾冬陞執導的新片《千杯不醉》中，飾演楊千嬅的寃家，角色是名擁有36D豐滿身材的啤酒妹。雖然Ella本身33Ｂ的上圍已十分豐滿，但在新片中仍須裝假狗上陣，而且Ella表示近日發福不少，故已開始積極健身減肥，希望盡快回復苗條身段。

戒吃零食
日前Ella在九龍灣一會所玩健身器械喼弗，又頻做收緊臀部的體操動作，她說：「舊年我得一百一十磅，𠵱家有一百二十磅，不過已經比早排瘦咗四磅啦，但都係好肥，啲人嗌我做肥肥、肥姐、肥妹或者阿脂，係脂肪嘅脂。我𠵱家大patpat、大髀同手都好肥，搞到我好灰、好心傷吖，冇晒自信，又唔開心，一定要快啲減肥。」
除勤力健身外，Ella更作地獄式減肥行動消脂，她說：「我唔會食減肥藥，因為驚個人會變得憔悴，做多啲運動、晚晚食菜同戒晒啲零食囉，再唔係就試吓搵人推脂，睇吓有冇效。」

唔敢隆胸
Ella在新片中飾演一名大胸女郎，問她會否渴望擁有一副魔鬼身材時，Ella笑說：「我自己就唔會諗要身材好勁爆，太爆會畀人唔正經嘅感覺，出街時啲人就淨係望住你個胸，最緊要係啱比例啫。」
其實圈中不少女星曾隆胸或整容，問Ella曾否考慮隆胸？她即說：「我唔會用呢啲唔天然嘅方法，咁我嘅身形又未致好衰，係肥啲啫，其實自自然然咪幾好，我唔敢放啲嘢喺身體入面，驚唔自在，人工嘢點都要有危險性，重唔知有冇後遺症。」
採訪：朱倬誼　攝影：陳偉權　場地：ClubRegency