美國國務卿蓬佩奧（Mike Pompeo）周日（16日）接受《Fox News Sunday》訪問時，稱總統特朗普6月底出席大阪二十國集團（G20）峰會，將與中國國家主席習近平談及香港連場大型示威的情況，所以特首林鄭月娥罕見發表致歉聲明，昨日又開記招稱「無限期」推遲修訂《逃犯條例》草案。有網民更發現林鄭英文版聲明疑用語言「偽術」，令外國傳媒以為港人成功爭取訴求，欲在峰會前淡化此事。

昨日政府發表行政長官會見傳媒答問內容，林鄭強調：「這條條例草案，大家都記得，我在六月十五日宣佈後，我們已經即時停止了條例草案立法工作，而且並沒有再為這項工作設定任何時間表。」然而面對記者查問能否承諾二讀時限失效前不會重啟，及為何不撤回條例，林鄭均無正面回應。面對政府此等態度，網絡上普遍不接受特首林鄭所謂的「道歉」，更有網民指，林鄭根本毫無誠信，但不少外媒誤信林鄭的「語言偽術」，以為「暫緩」等同「撤回」，更以「勝利」形容事件。

對此，一直關注事件的邵仲衡回覆《蘋果》時表示：「佢噚日喺嗰個『道歉會』上面講嗰樣嘢係『暫緩』。大家都明白個規矩係立法會個季度完咗，如果都唔通過，就自動作廢。咁佢點解唔講到咁明話會取消呢？佢有佢技術上嘅原因，呢樣嘢我哋唔多唔少都估到啦！反而我覺得而家呢個時候，大家要明白一樣嘢就係，點解佢哋（網民）咁緊張呢？佢個聲明係畀國際媒體，呢件事上的確國際社會幫到手，但係唔使驚佢誤導到，冇必要用小人心去睇呢件事。」

邵仲衡說：「其實宏觀啲睇，其實人哋國際社會各國都有持份者喺香港，佢哋都有人去收風、睇到實際情況，可能會比我哋睇得更多、或者更少，但係總括嚟講，人哋都有佢哋自己嘅人，佢哋唔係儍㗎嘛，人哋都會睇到，所以我覺得唔需要太過矯枉過正。我覺得已經係階段性爭取到嘅成功，我覺得唔需要擔心佢會拎番出嚟，佢冇咁嘅力量，就算將來下一任亦未必。其實同廿三條一樣咋嘛，牽涉好大嘅問題，關乎成個香港嘅根基。」

邵仲衡更呼籲大家：「我覺得而家要留意嘅係其他議題，例如啲『宇宙級建設』（大白象工程），或者香港人嘅教育問題，大家都見啲課程、啲歷史書係點，仲要後面啲國歌法等等。我諗喺2047之前我哋都要守住呢啲門口。老實講，我哋回歸咗畀『祖國』，大家都想好。」
-----------------------------
你撐蘋果 我捐$1
支援反送中抗爭者