最近推出新專輯《Ugly Beauty》嘅台灣天后蔡依林（Jolin），早前接受YouTuber「理科太太」嘅訪問，訪問今日播出，內容以審美觀出發，喺舞台上形象百變嘅Jolin提到原來佢好少照鏡，以前亦唔會過問幫佢打扮同搞形象嘅人整咗啲咩出嚟，因為佢完全信任嗰班人，佢更坦言唔覺得自己靚，而且都唔知道咩叫靚。

傾傾吓，Jolin提到自己曾發惡夢，夢裏面佢將愛犬「屋虎」分屍！Jolin話：「場景是在海邊，我正在準備要抓魚還是釣魚之類，我就看到我家的狗在石頭上，在那邊喝水，我也很開心就回頭看看，牠就沒有呼吸了，牠就死了，下一幕呢，我開始就把牠……確定牠死掉後，就開始分屍，還把牠裝在那個塑膠袋裏面。」

聽到呢度，理科太太額角冒3條直線出嚟，但Jolin話自己當時非常平靜，之後喺夢境中出現兩位女性朋友A同B，以及一名男性朋友，Jolin向女性朋友A追究隻狗係咪因為飲咗海水而死，個人開始變得焦躁，之後嘅場景係Jolin落地下室，佢攞住條車匙，畀咗個男性朋友，叫對方車佢走，之後就醒咗。

Jolin話，佢後來開始拆解呢個夢，其實夢入面3個朋友都係自己嘅分身，「我覺得對我來說那有點像是對於愛情的方式，譬如說這個東西突然間要離開我，不願意接受這個事實，我開始會很焦慮，就會很生氣，我本來是很平靜的，『看似』很平靜，但是我可能會覺得『是不是一定是他的問題？』開始追究。然後B有點像是在告訴你『就放下吧』，那個男生手持鑰匙，對我來說它是一個轉機，可是我把機會交給別人。」Jolin仲將件事睇成，其實佢係可以自己救自己嘅，所以喺佢夢醒之後，就覺得真係要珍惜一切，尤其係佢同愛犬相處嘅時間。

其後，Jolin再理解到要對自己嘅快樂負責，唔可以等一個白馬王子嚟救自己，而佢仲睇到自己嘅愛情模式，話可能係放唔低，自己一直唔想相信呢件事，而呢個愛情模式，會喺夢入面好赤裸咁演繹出嚟。

另外，Jolin喺訪問中都有流露感性嘅一面，佢承認自己以前曾經有過自卑同冇安全感，以前嘅佢會好努力完成其他人嘅期望，但佢唔記得咗自己到底係乜嘢，到佢拍《我》MV時，導演安排佢望住塊鏡，講咗一大堆「你辛苦啦」之類嘅說話，Jolin聽聽吓就爆喊！雖然唔知點解，但佢發現原來好少咁仔細嚟睇自己，然後發現佢一講到自己之前嘅過程時，就會好想喊，為咗搵原因，Jolin開始探索自己，仲買大堆心理相關嘅書返屋企睇。

而一直追求「美」嘅Jolin，自爆試過要求健身教練幫佢做到理想嘅體形，仲好妒忌一啲「靚人」，又去搵對方嘅缺點嚟滿足自己，但後嚟佢突然醒覺，原來自己都有呢一面，又明白點解有haters嘅出現，跟住佢就話：「我可不可以不要成為別人？」醒覺後，Jolin就開始去搵番屬於自己嘅靚，亦覺得「不用跟着社會的標準的美去定義自己。」

《理科太太 x Jolin - Ugly beauty 也是一種美》連結： https://bit.ly/2EMpXiw

精選娛聞，喺晒《娛果》
http://fb.com/appledailyent