唔通元朗區對於政制局嚟講，八字好鬼夾？八方發現無論梁振英或林鄭班子，政制及內地事務局嘅局長同副局長中，都有一位官員係嚟自元朗區同一間學校，表明同林鄭步伐唔一致，7.1後離開熱廚房嘅現屆政制局局長譚志源，畢業於新界鄉議局元朗區中學，農曆年就喺鄉議局新春團拜中，同獲頒發兩萬蚊獎學金嘅女狀元小師妹合照。

雖然接任譚志源嘅候任政制局局長聶德權喺觀塘瑪利諾書院畢業，唔係新界鄉議局元朗區中學出品，但盛傳會任政制局副局長嘅運輸及房屋局副秘書長陳帥夫，卻同樣係新界鄉議局元朗區中學舊生。

翻查資料可見，陳帥夫出席過母校嘅45周年傑出校友講座，據校友會嘅刊物報道，陳帥夫提及從政以來最深刻嘅經歷，就係911事發當日陪同時任特首出訪美國，除咗近距離目睹現場狀況，亦驚嘆香港喺外國元首心目中地位幾咁重要，因為襲擊事件稍為安頓，就第一時間獲接見。

吖，唔知未來嘅政制局政治助理，會唔會咁啱得咁橋都係陳帥夫嘅師弟？