在香港玩車可謂困難重重，不但法規多多，也欠社會氛圍，自然不如外國般普遍。但打壓越大、反彈越大，仍有不少車迷堅持迎難而上，努力實現改車夢，有人更把朝夕相對的搵食車改頭換面。

不少車主也喜歡改裝ToyotaHIACE，但是像Brian般徹底則十分罕見，尤其是搶眼的綠、黑色貼紙，乍看還以為是《機動戰士高達》的渣古呢！Brain解釋，只是相信綠色會帶來好運，並說：「以前揸貨櫃車嗰陣已經玩改裝，都係參考吓日本人，睇佢哋係點樣設計，再自己構思，一邊睇書一邊問朋友學番嚟。」
眼前這台HIACE，車頭、泵把、胎軨、沙板及裙腳等，全是Brian親自設計、尋找日本配件，雖不是獨力裝配，但前後也花了四年時間，成本約20萬，花了不少心血。記者尤其欣賞趟門部份，因要遷就凸出來的沙板，Brian特意換上開合角度更大的新門鉸。他說現在改車比以前方便得多，毋須事事勞煩日本朋友幫手，直接上網搜尋便可找到不少資訊。
今年年初，更有日本改車雜誌訪問Brian，努力受到肯定，「之前香港有個大型改裝展，日本雜誌飛過嚟拍攝，個記者咁啱識得一啲HIACE嘅車房同零售商，順便嚟影啲靚嘅HIACE，所以咪搵咗我囉。當時我都好興奮，畢竟玩咗咁多年日本車，有機會登上日本嘅雜誌，的確值得高興。不過最煩可能係驗車嗰陣，要交畀車房拆走啲零件先拎去，雖然係繁複咗啲，但玩改裝車就預咗。」其實不時要裝要拆，又有觸犯法例風險，奉勤大家改裝前三思。

記者︰梁立勤