「收得幾百萬英鎊 冇理由咁欺場」
Britney個唱咪嘴辣㷫Fans

蘋果日報 2004/04/28 00:00


美國偶像歌手BritneySpears,一向都喺演唱會上咪嘴,我大口羅拉喺日本都見識過,可能嗰次係免費騷,所以冇觀眾投訴。不過,Britney前日喺倫敦開騷,每張飛成四百蚊港紙,佢竟然全程咪嘴,搞到全場一萬二千個fans好鬼㷫!

「極度失望」
Britney前晚喺倫敦開騷,着咗套緊身貓女裝上台表演,好鬼野性,引起觀眾尖叫,但係Briteny開聲唱歌嗰陣,啲觀眾已經覺得好唔對路,佢竟然係成場都咪嘴,並唔係現場唱歌畀人聽。個騷完咗之後,成班觀眾都帶住俾人「屈」嘅不快心情離開。
有fans好嬲咁話:「我為咗睇呢個騷,儲咗好耐錢,我真係極度失望!」
另外英國《太陽報》娛樂版編輯亦為fans抱不平咁話:「Britney係堂堂一個性感大歌星,又有一把靚聲,我真係唔明佢點解要咪嘴呃fans,就算Britney私生活上正面對一個好艱辛嘅時刻,但佢收得人幾百萬英鎊,冇理由咁樣欺場!」
聽聞Britney呢期成日大叫,好似佢去倫敦之前,就俾人發現佢因為俾有妻有兒嘅新男友欺騙,所以喺比華利山嘅酒店發癲亂叫;佢到海灘游水嗰陣又遇見鯊魚,亦嚇到亂叫,唔知係咪咁搞到佢唱唔到歌呢?