雷深如（J.Arie）今日到將軍澳為西貢好聲音2017活動做表演嘉賓，今日是她28歲生日，有fans驚喜送上蛋糕祝賀，工作後J.Arie會和家人食飯慶祝，佢話任何節日都會同屋企人過。

今年生日欠缺男友，J.Arie同band友男友拍拖後一直有消息話父母唔鍾意，早前佢認好少同男友見面，o依家正式分埋手，J.Arie話：「原因係唔夾，屋企人唔係主因，最初都會唔開心落淚，o依家OK。」

J.Arie自稱事業型女性，唔心急再拍拖，冇咁快要結婚，目標亦都唔使一定係富二代，喜歡由零開始成長，白手興家，呢個係價值觀問題，但如果有富家公子追？佢就轉軚話：「咁會視察吓先，唔會因為外在條件而吸引。」J.Arie都係富家女，但佢就自嘲係長期貧困。佢近期返內地拍攝網絡大電影，J.Arie坦言唔怕內地工作辛苦，話自己麻甩，擔擔抬抬都得。

更多娛聞，喺晒《娛果》
http://fb.com/appledailyent