立法會補選結果出爐，好多民主派支持者仍然為姚松炎落選、九龍西痛失一席感到惋惜，呢兩日網上出現唔少死因分析、評論，其中一類鞭撻聲最響亮嘅，要數姚教授喺九龍西擺放、展示嘅選舉橫額。

話說姚教授競選陣營，用最環保嘅方法去做選舉橫額，除咗上個月初邀請街坊齊齊自己願景自己寫，仲有一批義工手畫二手橫額，例如用東區區議員徐子見嘅舊橫額，反轉重用寫上今次補選宣傳內容。

不過唔少橫額都相片欠奉，大頭相都冇張，又難怪有街坊話唔知姚教授係邊個。時事評論員林忌更喺FB分享一張據稱屬於姚教授競選團隊嘅橫額，上面有隻「大白象」，伸咗個頭入「斷頭台」，旁邊寫住「不要大白象」，然後...就沒有然後了。林忌形容，呢張係今次補選「最有幻想力，不過冇人知係乜的選舉宣傳品」。

有網民留言話，唔講真係唔知係宣傳banner，以為係惡搞之作，亦有人話「相又無，人名又無…其實可以唔當選舉廣告」，認為宣傳橫額無法達到宣傳成效，選民其實唔係唔支持姚教授，而係根本唔識姚教授。曾經參選2015年區議會選舉出戰油尖旺櫻桃選區嘅「中出羊子」，留言話「我啲banner都要企埋一邊了」。

立會補選新聞，《蘋果》一網睇晒
http://bit.ly/appledaily311