近日不少上市公司，都利用「披露易」平台刊發自願公告，稱開拓防疫業務，成另類宣傳渠道，其中消毒產品代理商Dove Biotech HK是受惠者之一。Cool Link（8491）早前公佈，收購此代理商，以發展消毒品牌美衛加（Miriguard）業務。相信大眾對此消毒品牌感陌生，但事實上，它早於2013年，已希望借H7N9禽流感爆發殺出一條血路，但最終失敗收場。有見近期武漢肺炎肆虐，為公司帶來一次捲土重來的契機，深信「香港製造」有市場，全因香港人「做嘢有底線」。

2013年H7N9禽流感肆虐中國，至年底香港出現更出現首宗確診個案，令當年原本從事金融顧問服務的Sylvia Chan決定踩過界，涉足消毒產品業務，「講真你做finance嘅，點會突然走去做消毒液呢？咁都係因為2013年一腔熱血。」

現為Dove Biotech HK營運總監之Sylvia表示，當年因一次機緣，於海外生物實驗室引進一條可殺滅禽流感之消毒配方，隨即進行測試，並與合作廠房準備量產。一切準備就緒，原本打算進入雞販市場，豈料香港當局卻於14年初，決定將長沙灣批發市場二萬隻活禽銷毀；同時疫情已開始減退，連打入家居市場的如意算盤亦「打唔響」，「大家防疫意識去返正常水平，對個品牌都有幾大挫折。」再加上商標註冊遇上阻滯，令他們決定放緩腳步，主力做批發消毒業務，直至2016年才改名為「Miriguard美衛加」。

去年底內地武漢肺炎疫情趨近失控，港人開始搶購抗疫用品。他們意識到本地供應或許追不上需求，於是「拎返條配方出嚟」重新推廣品牌，找來本地一間GMP廠商趕貨，近日起貨十萬支以上。「幾年前有朋友試用過隻消毒液，最近成日問有無貨。我哋反而先送咗一批貨畀前線醫護人員用，因為佢哋最有需要。」

Sylvia稱團隊成員由年初開始，日以繼夜在周邊地區搜羅原材料，無奈內地廠房停工，韓國、泰國、馬來西亞等地貨源越搶越貴，「要用三倍至十倍價錢，甚至有錢都買唔到……唔好講個成本喇，講起會好心酸、會喊。啲單而家都未埋晒，實際開支未計到，但都好肯定會蝕。」她苦笑道，疫症關乎人命，不能以做生意心態處理；見老人家要為口罩而四出奔走，內心不好過，盼市民「撲少一樣嘢就少一樣」。

由2013年至去年底，除重塑品牌之外，公司亦積極取得認證。消毒液配方已通過全球多間高規格實驗室測試，證明可以根絕中東呼吸症候群冠狀病毒、H7N9禽流感、大腸桿菌等病毒。她續道，嬰孩和部份人體質敏感，惟市面上不含酒精產品不多，其產品或許可以解決部份人困擾。

雖曰短期內有虧蝕，她對產品前景仍有信心，預期隨着公眾衞生意識提高，銷量會逐步提升，「日後再諗點樣賺」。她又留意到不少人提倡香港再工業化，以免他日再陷資源短缺，而其公司標榜香港製造，相信亦是一大賣點：「我覺得香港製造係返番嚟。香港人做嘢係有底線，唔會為一個幾毫，放棄質素。外國朋友一聽到件貨係Made in Hong Kong，都會讚好。」

記者：鍾榮傑

影片
採訪 / 鍾榮傑
編撰、旁白 / 鍾榮傑
攝影 / Gary、何文超
剪接、後期 / Boy
編審 / 倪敏慧

investMAN
For People of Style & Substance
掌握理財智慧 感受生活品味
http://investMAN.hk
-----------------------------
【武漢肺炎】專頁
全民自救 抗疫資訊盡在《蘋果》