曾是大台新聞主播的方健儀，7年前毅然離開主播崗位，轉職廉政公署做文職，直至14年尾離職。其後她一直以自由身做電台主持、活動司儀、電視節目主持、客串電影等，甚至初試啼聲唱歌。近月有關抗爭的新聞繁多，曾當過記者跑在前線的方健儀坦言技癢︰「我有諗過有咩身份，可以去現場採訪？」

近年方健儀以自由身接工作，她坦言可以做回自己，「以前報新聞，或者做文職會好規範，而家可以真性情啲，見到一個真嘅方健儀。」最近她為香港開電視主持新節目《Fit開有條路》，談健康及一些健康冷知識。她表示節目不單止談健康，亦會以近期流行或時事話題來作討論，「好似近排講嘅雷射筆或槍，而且係對大家有切身嘅影響。至於一啲身體上或精神上的健康，涉及範圍都好廣，所以準備工夫都要做到足。」談到一些健康冷知識，她說︰「例如抆咗1條白頭髮係咪會生3條？又例如女性月經周期，係咪唔飲得凍飲？呢啲迷思，係幾得意。」

經常寫飲食專欄的她笑指不會甚麼都吃，她笑說︰「我就唔係乜鬼都食，自己向來都注重食得健康，亦都鍾意用文字去表達。」問她會否再出書講飲講食？她說︰「我屋企有對識飲、識食、識煮嘅父母，我爸爸食到有個大肚腩，我媽媽以前係烹飪冠軍，識得煮，加埋我老公，直頭可以出番本『洪荒之力』烹飪書，點解？因為我老公姓洪。」說罷她也大笑。

談到近日的抗爭運動，曾是大台主播的方健儀，亦有留意相關新聞，離開大台7年，問她可有技癢？她坦言︰「好多人同我講，或者喺我嘅專頁留言，話想聽番我報新聞，可能係大家嘅集體回憶。呢個癢，一路都有，自己都喜歡傳媒行業。」

方健儀坦言其記者生涯中，遇到較大型的社會事件，追溯到2005年的世貿會議韓農來港抗爭，她說︰「嗰時我比較喜歡衝鋒陷陣。」談到近月抗爭運動，她說︰「做記者時採訪過唔同嘅社會運動，今次廣度及深度係前所未有。我好理解好多香港人嘅訴求，好希望過程中，甚至事件告一段落後，大家都可以齊齊整整，平平安安。」雖然她沒有經歷過像今次密集式的採訪經歷，但她每次看新聞都在想，「我都諗有咩身份可以去採訪？甚至會諗，外國傳媒需唔需要啲地頭蟲、聯絡人去採訪，或者廣東話繙譯？真係好技癢。」

談到她的老公仍在大台新聞部工作，問她可有擔心老公落前線？她說︰「佢有30年經驗有咩場面未見過，佢會處變不驚。有時佢落到去有人同佢講『洪生，加油！』」近排外間有不少聲音，對無綫新聞批評之聲不絕，對於舊公司，她坦言︰「離開咗都有7年，佢哋嘅變化、人事崗位都有變動，我已經掌握唔到，亦唔想俾人覺得我離開咗仲做塘邊鶴。」她認為現在資訊發達，每日有很多新聞，甚至一下子也看不完，消化不了，「我哋仲有資訊自由，大家可以自由選擇可信嘅傳媒。」

採訪︰羅婉玲
攝錄︰葉君海
化妝︰Herman Ng
髮型︰Vincent Yeung@M Plus Salon
場地︰Kowloon Partyroom

-----------------------------
【撐學生】
召集有心人 撐學生全年睇《蘋果》
立即按此