《歲月風雲》近期宣傳攻勢浪接浪，苗僑偉（三哥）、胡杏兒、李克勤、鄧萃雯（雯女）等昨日到尖沙嘴出席該劇的MV首播禮。今次《歲》劇主題曲由顧嘉煇作曲，並邀請葉詠詩指揮香港小交響樂團演奏，同時無綫更以高清技術攝製MV。李克勤及台灣歌手小剛分別以廣東話及普通話獻唱，克勤透露這首歌破天荒可以在中央台播放廣東話，笑言為廣東話爭一口氣。

杏兒成搶手貨

昨日適逢是三哥的49歲牛一，所以也順道為他慶祝，雯女吻賀壽星公之餘，也不忘取笑他和梁靖琪（Toby）的緋聞，三哥即時反擊說：「有緋聞唔緊要，只要有屋企人同高層諒解，梁家樹（Toby的父親）叫我奉旨媾女，所以先同佢個女拖吓手仔。」身旁的司儀蔡康年聞言說：「所以咪自己人搞自己人囉。」三哥透露早前在北京遺失手提電話，內有藝人電話及照片，幸好其妻戚美珍已送了新手機給他。
近日有雜誌以「速食」來形容胡杏兒與《歲》劇內地演員馮紹峰的緋聞，杏兒對此回應說：「Yeah！自己不嬲都有市場，話我速食，公仔麵咩，真係激氣，應該係慢慢歎。」問馮紹峰和黃宗澤哪個較靚仔時，她即說：「一個瘦咁多，一個肥啲（指黃宗澤）！唔好話佢肥，佢會嬲，佢只係健碩同高大威猛。」
採訪：駱華齡　攝影：陳俊強