殼后朱李月華（朱太）同老公朱生嚟緊會去韓國濟州舉行盛大party，但今次唔係因為藍鼎（582），而係慶祝佢「登六」啊！原來後日就係朱太嘅60歲大壽，華華真係恭喜晒佢。
朱太1958年8月3日喺香港出世，承住父親賭業猛人嘅朵兼強勁嘅交際手腕，叱咤資本市場多年，殼后嘅名堂響噹噹，亦都結識咗唔少好朋友。

金利豐「黎明」扮閔大人

聽聞今次財經界盛事，朱太將會包機兼包酒店，接近300位親朋戚友去韓國濟州玩幾日，由聽日起至到5號連續4日不醉無歸。
除此以外，今次個party仲有啲搞作，就係扮東盟峯會領導人咁要着民族服飾，所有參加者都要着民族服，但就冇規定點着，着乜嘢國家都得。華華搵咗阿金利豐「黎明」黃德几八卦吓，佢話自己會做大會司儀㖭啊，而服飾佢就揀咗《大長今》入面嘅閔大人裝束。
其實朱太同韓國濟州一啲都唔陌生，幾年前藍鼎供股時，金利豐就係包銷商，今年初藍鼎喺濟州嘅新賭場開幕，朱太都有特登去捧場睇G-Dragon，唔知今次party會唔會都有韓國藝人出現呢？

李華華
mailto:[email protected]