日本樂壇天后安室奈美惠再度襲港，佢已定明年3月假亞博舉行第二次香港演唱會，今日下晝佢喺W酒店舉行記者招待會，大談可以再見香港歌迷嘅興奮心情。

安室今日準時於下午3點出席記招，佢着住Chanel嘅2015秋冬裙再襯Chanel頸鍊，甫登場即用日文自我介紹，佢表示好開心同埋緊張，好期待下年3月開騷時可以同香港歌迷融為一體，以及過一個開心嘅晚上。問到今次日本Tour用上華麗舞台，安室都話望盡量將原裝舞台搬到香港，而佢就話開騷前冇特別去鍛鍊體能，但演出前就先會預早兩個月備戰。安室一直都係時尚icon，佢有談到自己style，話平時唔使開工都會盡量簡約，亦會以黑白配搭為主。

安室早前專輯《_genic》同虛擬偶像初音未來破天荒合作《BWhoIWant2B》一曲，安室就話呢次合作係個新衝擊，形容創新嘗試夠晒挑戰性。至於下月推出全新單曲《RedCarpet》，佢就話呢首歌係講人生總有機會遇到個可以同自己行紅地毯嘅人，唔知係咪有咩暗示呢？