李八方online︱紫荊黨稱吸25萬黨員 朱凱廸：香港地下共產黨浮面？
蘋果日報 2020/12/07 20:50
李八方online紫荊黨
近日有指全國政協委員嘅瑞信董事李山成立咗一個叫「紫荊黨」嘅黨派，仲有意招募25萬個黨員。
共產黨員滲透香港，都唔係秘密咯，日後可能大模廝樣進佔大家各個生活層面。《南華早報》日前報道，有班「新香港人」如身兼全國政協委員嘅瑞信董事李山等，今年5月底低調成立「紫荊黨」，想招募25萬黨員，強調新政黨要成為「一國兩制」嘅堅定擁護者。
外界質疑中共係咪想用呢個新黨取代香港現有政黨？前立法會議員朱凱廸唔係咁睇，佢噚日（6日）喺社交媒站發帖，話從「紫荊黨」擬定中嘅25萬驚人黨員數目而言，「情況可能不是以新組織取代舊組織，反而更似是直接將香港的地下共產黨組織浮面，繼而建立與大陸相匹配的黨委管治制度」。
朱凱廸於Facebook上評論有關「紫荊黨」有意招攬25萬名黨員嘅報道。互聯網
睇返成立近30年嘅民建聯，25萬係佢哋4萬黨員人數嘅6倍，佔香港人口比例3.3％。話呢個規模全球民主國家嘅執政黨都難以匹敵。如果數字冇「作大」或「隨口噏」，阿廸話唯一能建立到呢個規模黨組織嘅方法，就係直接將潛伏在港嘅中共地下黨員浮面，喺國安法時代建立「一黨獨大」嘅政治組織，同大陸正式睇齊，覺得未來可能唔係「紫荊黨」同「民建聯」內鬥，而係「民建聯」併入「紫荊黨」，由中聯辦領導嘅香港黨委系統，全面成形。寫到呢度，真係有啲寒寒哋……
如果紫荊黨變成最大嘅建制黨派，到時民建聯嘅一眾成員又應該何去何從呢？資料圖片
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！