鄧月平今日帶病去到商台接受訪問，佢話前日20歲生日，朋友叫佢着靚啲，可能着得太少布而冷親。佢話閨蜜同一班朋友安排咗神秘party俾佢，令佢非常驚喜，鄧月平話：「朋友佈置咗間好靚嘅酒窖，又喺沙灘砌心心，之後去咗塘福BBQ，燒到3點，跟住7點起身拍戲，拍到一半就唔舒服。」

鄧月平指年齡步入另一個字頭，自己會多做義工：「做義工最能令自己放鬆，今年訂咗啲手襪送俾公公、婆婆。」聖誕要工作中度過，鄧月平指自己現時單身，突然發覺身邊好似有追求者，鄧月平話：「原本都唔覺，經過生日後，有兩個男仔對我特別殷勤，我都直接問佢哋係唔係追我，佢哋都話係，等我觀察吓先，自己想另一半諒解我工作忙，冇乜時間陪對方。」

更多娛聞，喺晒《娛果》
http://fb.com/appledailyent