港股調整僅一日，又再升過。噚日恒指曾一度回軟140多點，但尾段再抽上去，特別係期指的升勢更為凌厲，結果恒指升288點，收23137；期指更大升600點，收23230，高水近100點。內地股市雖急挫，但國企同中資股個勢仍然好強，H指更有154點進賬。
大市若確認再起升浪，則股仔將會接力而上，噚日上升正股同下跌正股數目雖然相若，各有400多隻，但大升的股仔已越來越多，噚日頭三大升幅由23%至32%不等，而升幅超過10%的亦有26隻，上升層面已開始擴散，未來的一兩個月，相信股仔炒風會再起，甚至百花齊放。
中國林大（910）一日之內大升18.8%，搶上1.01元最高收，成交更大增到2.6億股，此股已沉咗好耐，今次轉勢，可確認中期調整完成，再起升浪，未來升幅會非常可觀。
首先，林大噚日已升穿去年11月初2.82元高位伸延的下降軌，並「篤穿」10日線（0.872元）同20日線（0.988元），且有超大成交支持，MACD亦出現熊牛入貨訊號，初步已可視為「跌完，再升過」。

林大去年7月底曾高見3.20元，上月中最低落到0.74元才回升；一個跌浪，跌足7個月，而跌幅更高達76.8%。大洗牌之後，未來嘅升浪，肯定會好勁，即使以反彈前跌幅的0.382，股價已可重上1.68元；若反彈0.5，更可見1.97元。
林大一日急升，股價已上到保歷加通道中軸水平，可能要唞一唞氣，整固後再上，初步目標指向通道頂的1.24元水平。林大若回氣，在1元樓下正係低吸大好機會。

內地年初的雪災，對林大的林木資源有破壞，但影響只係好輕微，而德意志和滙豐兩間大行在今年2月份所發表的研究報告，亦繼續看好林大前景。德意志因應雪災帶來影響，調低林大12個月目標價，由3.41元降至2.58元，維持林大「買入」評級。報告推出時林大股價1.38元，現時在1元水平，更吸引。
滙豐亦認為雪災對林大的銷售和盈利只係有兩至三個巴仙的影響，而在下一個伐木季節來臨前，森林已有足夠時間復原，現年度（09年3月結）盈利不會有影響。