袁鳳瑛、仙樂都、顏仟汶等，噚晚喺九展出席「萬眾愛心歌聲齊抗毒」活動，袁鳳瑛話o依家做緊家庭輔導工作，同教小朋友演戲：「今晚同小朋友一齊做舞台劇，講反吸毒訊息，我做導演，教小朋友唔難，小朋友有佢哋自己嘅天份，主要睇佢哋習唔習慣去演出，我會當佢哋專業演員咁去教，我可以好惡，好似之前四川震災騷，有個小朋友失控，我都趕佢走，好強硬，我工作好認真。」

歌曲《天若有情》係袁鳳瑛嘅成名作，問到會唔會再復出樂壇？佢笑話：「唔知，都要睇下傳媒點睇，我呢啲年紀擺喺古董鋪都唔要啦！我確係有小小心理障礙，但如果大家需要我出嚟，我係會出番嚟嘅。」佢仲話《天若有情》呢首歌好出名，但首歌並唔喺屬於佢自己：「係屬於香港，但我都好有演藝癮，冇話特別想唔想開演唱會，我反而鍾意team work。」

另仙樂都、顏仟汶、同網絡歌手楊峰活動上組team唱歌，佢哋話冇組合名，只係一齊唱歌，其中一首歌揀咗《紅日》，宣揚抗毒訊息。顏仟汶話樣樣都做吓，今次嘅活動，訊息正面，自己有份做都好開心：「我一直冇停冇走過，有登台同拍內地劇，慈善騷都做，o依家忙住練拳、跑步keep fit，因為電影角色需要，要性感仲要打。」仙樂都就笑話綵排時，喺台上見到顏仟汶好似放狗咁，跑嚟跑去，顏仟汶就解釋：「我平時工作都一定着高踭鞋，今日唔使着覺得好開心嘛。」