【全城禁聚】監製李志倫趕尾班車睇戲:咁樣封法係攬炒
攬炒李志倫戲院停業
採訪:王連連、黃曉妍、羅慧敏
攝影:黃曉程、馮嘉銘、仇志德
特首林鄭今日又認叻,表示政府「迅速」應對疫情,不過之前所建議的禁酒令就彈弓手收回,改推兩項新政策,包括要公眾娛樂場所,在明日下午6時起,停業14日。
戲院、健身室、party room等場所在今次新措施的管制之下,市民要睇戲,就要趁停業前入場,或者最快要等兩星期後戲院復業。今日下午位於尖沙嘴的戲院如常營業,不過疫情關係,人流稀少,《蘋果》在尖沙嘴The One的百老匯戲院外,遇見監製兼導演李志倫(Jacky)趁戲院關閉前趕往買飛睇戲,他說:「知道聽日戲院停14日,諗住歷史性閂門之前睇最後一場戲。始終我哋係娛樂圈製作人,都會去戲院支持港產片。我覺得全香港嘅食肆又好,戲院又好,咁樣封法係攬炒,如果一早封關嘅就唔使suffer得咁緊要。而對我哋娛樂圈嚟講係有幾深遠嘅影響嘅,我拍緊好多片,有部戲啱啱上畫同埋演唱會全部停晒,所以都係幾大打擊。」他更直言很多同行冇工開,他說:「今次疫情對生計緊係有影響,我哋好彩係喺娛樂圈中間嗰層,喺好多唔同範疇低下嗰層,生計會更加影響。」
任臨時演員的年叔與女友人亦買了今晚的戲票,年叔得悉戲院將於明天關閉14天,直言要睇多套,他說:「其實我唔贊成關閉,因為戲院係咁多娛樂場所中最低迷嘅,其實發生咗事之後都有間隔,任何戲院都冇人龍,對我嚟講戲院係一個舒緩壓力嘅小堡壘,而家兩星期係理解同接受,不過影響電影業非常之大。」
而在中環ifc外亦不乏戲院顧客,鄭小姐稱約了朋友睇戲,知道政策但不支持實施:「如果咁樣強制迫人就冇嘢做,放假一定要有嘢消遣,我哋出街自己都會戴口罩、洗手,大家可做到防護。本來諗住放假照出去,但就可能戴口罩、消毒濕紙巾嗰啲,(睇戲、聚會)嗰啲都照得嘅。會約少啲朋友、但唔會全部留喺屋企,睇下戲OK。」市民劉先生形容新措施冇乜用,希望盡快封關:「去餐廳都唔坐對面,約朋友會小心啲、信佢哋,同埋喺公眾場所戴口罩,因為你戴係保障人哋同自己。我都有諗過睇戲,我覺得政府可快啲封關先,封咗大陸關先,因為嗰個係源頭。」
另外,市民黃先生仍有到銅鑼灣睇戲,他認同新措施多餘:「唔支持,冇乜影響,冇party room都會喺自己屋企玩,喺戲院好難傳染到,入去係睇戲,都唔係傾偈,同埋你不如禁止食飯,咪仲容易傳染。」市民袁先生鬧爆林鄭不盡早封關:「吓!超過4個人咁點呀?係咪捉去打靶?梗係唔支持啦,佢唔放咁多有菌嘅人落嚟就唔會搞到咁啦,全世界都知一早要封關啦,你睇澳門有冇事,早封早着,而家4個人……違規咁點?又唔飲得酒,又唔去得公共場所,又唔可以超過4個人食飯,都可以打到麻雀嘅,咁返工呢?咁有X用呀!黐線嘅,叫埋佢兩個仔同老公返嚟啦!」
採訪:王連連、黃曉妍、羅慧敏
攝影:黃曉程、馮嘉銘、仇志德
-----------------------------
第三屆最港電影大獎
按此立即投票 -----------------------------
【武漢肺炎】專頁 全民自救 抗疫資訊盡在《蘋果》