中港大戰，「英雄輝」葉鴻輝連番撲救，成功抵擋中國隊41次射門，逼和中國隊0:0。英雄輝今日凌晨時份於ig披露中國隊隊長鄭智不服，而斥葉鴻輝為「狗」。英雄輝寫道:「我哋做到了！仲有，我哋香港隊係一心防守！自己贏唔到唔順氣走嚟話我係狗！亞洲足球先生，你係好波，但你嘅球品就完全唔得！」

港隊今日已返港，葉鴻輝證實鄭智在比賽中曾稱他為「狗」，問到可覺得鄭智是故意走過來鬧佢？葉鴻輝稱「可能係啩」，又認為鄭智可能只是久攻不下，故一時意氣鬧佢。(新聞連結: http://bit.ly/1fYzF16 )

對此，黃秋生就話:「如果呀鐵龍輝係狗，咁你連隻狗守龍門都射唔入，哎……真係唔七知你係乜嘞？(乜嘢省隊，縣隊？乜都唔係，係小島隊ok？小島隊同国國隊打和ok？)大笨象同隻烏蠅打和，大笨象輸埋個品。」

曾經同陳肇麒(陳七)n年前拍過拖嘅李綺雯，向來敢言，今日佢都有喺微博及ig轉貼鄭智鬧葉鴻輝係「狗」之報道，hashtag係:「那位#中港大戰#進不了球的#中國足球隊隊長#鄭智#賽後罵#香港守門員#葉鴻輝#是狗」再配上滴汗同兩個代表鄙視嘅emoji。

上微博講呢啲？大陸網民如螞蟻一樣纏上來，左一句「港獨」右一句「人點同港畜比呀」「都是中國人不是嗎？」不堪入目。有大陸網民指李綺雯挑撥離間，李綺雯回應道:「發生了就是事實，沒有挑撥離間。」也有網民指類似事件已非新鮮事，李綺雯就回覆道:「不新鮮早有前科。」但對於網民指陳七噚晚涉嫌犯手球，李綺雯冇回應。

最後點？李綺雯刪post。佢另一個講逼和中國嘅post，hashtag係:「#中港大戰#香港隊勁揪#香港隊加油#撐自己人#撐本地波#撐本地運動員#撐香港#撐香港運動員#」，留言亦相若。未知一陣會否又被消失了。

相關新聞:
【葉鴻輝澄清無被吐口水或淋水】
http://bit.ly/1Uw9Tie

【英雄輝返港回應被罵　「鄭智一時意氣」】
http://bit.ly/1LZ6gCj

【葉鴻輝指被國足隊長罵狗　梁孔德稱要看證據】
http://bit.ly/1Of1Swj

【郭家明指辱罵事件難跟進　比賽講粗口正常】
http://bit.ly/1Of8jzE

【鄭智侮辱葉鴻輝係狗】
http://bit.ly/1Odhssd