電訊盈科提出用19.43億收購旗下SUNDAY資產，搞到SUNDAY因為冇業務而變成現金公司，咁樣係唔符合上市資格嘅，要除牌！
呢一招曲線變相將SUNDAY私有化，俾有股壇長毛之稱嘅網上股評人DavidWebb批評為唔光彩嘅做法，係刻意迴避上市公司私有化程序……呢個漏洞，其實早幾年前港交所已經知道，仲曾經發表諮詢文件建議修例。
相信大家都記得02年7月仙股事件，當時引發事件嘅細價股除牌諮詢文件，其實有一段講到，上市公司若刻意採取企業行動，令其變成現金資產公司，嗰啲行動嘅效果，其實等同於未經股東批准嘅私有化行動，所以呢，港交所當時建議，上市公司喺進行任何會變成現金公司嘅企業行動前，要引入規管公司私有化嘅規定，即係要獲得75%小股東批准，反對票亦唔能夠超過10%。