林作去年放棄大律師執業資格後，改與補習學校合作執教鞭，同時又殺入娛樂圈，又拍戲又唱歌。不過，佢喺宣傳就推出嘅新歌之同時，自嘲自己係「樂壇終結者」，就連佢經理人范振鋒都唔畀面，話首歌最好唔好派去電台播。

不過，講起林作，除咗諗起麥明詩，最令人記住嘅一定係佢啲頭髮，永遠好似冇梳頭咁，佢自己都講過，話好多人都唔知佢個頭想點！

咁大家又想唔想知林作個頭整齊嘅時候係點嘅？唔使等，即刻就有得睇，事關佢今日喺Ig上載咗佢張斷開咗兩截嘅身份證！

林作嘅身份證一分為二，灰爆留言「GG」。大家問佢點樣整爆，但其實焦點都係佢張相——因為林生個頭唔單止整齊冇豎起，仲好清楚見到條三七分界，加埋佢副粗框眼鏡同甜絲絲嘅笑容，忽然變咗宅男。

《蘋果》今日搵過林作，問佢究竟點樣整爛張身份證？佢話：「因為難得有人欣賞我嘅童顏囉！」咩事？「我噚晚出夜街，喺某點門口被要求出示身分證，難得有人欣賞我童顏，於是超興奮喺銀包抽張證出嚟，結果就GG。」

問林作究竟去邊度要查身份證？佢話：「酒吧啫！搞到我尷尬到爆，仲要問對方：『咁，你仲俾唔俾我入？』」至於身份證係點樣啪斷一分為二，林作話已經唔係好記得，因為佢自己都斷咗（片）。

至於，幾時會去補領？林作即刻傳來兩張用膠紙黐番好身份證嘅相，仲話：「我冇打算去，因為我好怕去政府度整證。佢哋會喺喇叭叫我個名『林作』，細細個就覺得好尷尬，邊Q個會叫『林作』！」

就咁黐番都得？林作就話：「作為前大律師，我可以好誠實答你：唔肯定。不過依家有你寫番出嚟，以後就憑你篇報道當係驗證真身！」

精選娛聞，喺晒《娛果》
http://fb.com/appledailyent