香港回歸廿年，原來財經界嘅「新股女王」鍾絳虹（Pamela）亦喺新股市場打滾咗廿年，佢平時多數做新股背後的女人，噚日有隻市值30億嘅信邦控股（1571）首日掛牌，竟然吸引到佢去上市儀式表示支持，都算少見。
中央證券登記董事總經理鍾絳虹好低調，着住淺灰色連身裙，又冇上台影大合照，不過，佢過去廿年日日同iBanker、律師打交道，有時會畀意見對方，希望幫到佢哋啲客成功上市，所以噚日佢哋一聚頭又雞啄唔斷講唔停。
講到新股市場，Pamela話，上半年認真麻麻，散戶對新股反應冷淡，信邦集資8億元，唔算大隻，已經係反應較好嘅新股，加上佢同信邦保薦人法巴多合作，所以專登一早到場賀一賀。

分身做日本溫泉通

其實，Pamela除咗講新股叻，佢另一個身份係「日本溫泉通」。佢跟港人一樣，一年飛日本3、4轉，當地十大溫泉，佢幾乎試勻，專去發掘冇乜港人知嘅秘境，仲要開埋facebook page介紹。
嚟緊佢又去喇，不過唔係暑假旺季，事關佢希望下半年多啲生意，暑假要在港做準備，等到9月就會去青森一星期，打算入住當地最有名嘅星野溫泉，諗起到爽。

李華華
mailto:[email protected]

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk