加拿大天后Celine Dion昨晚起假澳門威尼斯人金光綜藝館舉行一連兩場「席琳‧迪翁2018澳門演唱會」，Celine妹妹譚芷昀昨日由家人陪同入場睇騷，首場幾乎座無虛席，主角Celine Dion於晚上8:50穿上一身金色打扮登場，先以一首《Power of Love》晒巨肺唱功，當佢唱完《That's the Way It Is》後就用廣東話講：「大家好！」之後再感謝觀眾話：「各位支持咗我的音樂已經三個世紀，好榮幸為大家表演。」又帶全場觀眾合唱，跟住佢換長裙出場獻唱《It's All Coming Back To Me Now》，當唱出《死侍2》（Deadpool 2）主題曲《Ashes》前，Celine Dion大讚電影係套好富娛樂性嘅正戲，但叫大家千祈唔可以帶小朋友入場，之後表演時台上更播出《死侍2》片段，

演唱會極盡視聽之娛，貴為天后嘅Celine Dion唔止唱功一流，佢亦甚懂帶動氣氛，其間叫工作人員幫佢除head mic時就作狀扮發脾氣，又扮狗吠，當男工作人員完成任務即錫對方面珠一啖。

Celine Dion全晚大唱金曲，包括《All by Myself》及經典動畫《美女與野獸》（Beauty and the Beast）嘅同名主題曲，之後換上黑色高衩裙晒腿唱出《At Seventeen》，又翻唱Prince嘅《Purple Rain》等。去到尾聲，Celine Dion穿閃爆短裙又跳又唱，但一度跳到甩皮帶，要工作人員上台為佢解圍，台下嘅Celine妹妹企在最前排不斷向偶像揮手。呢個時候，Celine Dion未唱到最後一曲、其代表作《鐵達尼號》主題曲《My Heart will go on》時，Celine妹妹已由媽咪拖住離座，唔聽自己上《全美一叮》嘅參賽歌就急急腳離場，未知最後有冇入後台見偶像呢？

精選娛聞，喺晒《娛果》
http://fb.com/appledailyent