由高志森執導，方力申(小方)、張繼聰、衛詩雅、楊思琦同邵音音主演嘅電影《女人永遠是對的》，噚晚喺奧海城舉行首映禮。

小方喺戲中同劉心悠一對，小方更獲心悠BB主動獻吻咀嘴，小方話：「被女仔主動錫梗係少......，梗係冇試過添，唔會未拍拖就咁主動，艷福我不嬲都有，真又好假又好都好多。」小方指心悠除咗係靚女，原來更係非常專業嘅藝術家，佢話：「佢鍾意做又唔怕辛苦。」小方話同張繼聰喺大馬拍戲時，相約一齊健身，佢笑住話：「我哋一齊做gym，摸吓大家嘅肌肉，為咗健康抗衰老，我有心有力仲舉到100磅，阿聰要練吓，保持體力同個女玩。」

衛詩雅第一次同張繼聰合作，點知臨場先知要同張繼聰咀嘴，詩雅話：「去到現場先知，我好尷尬，同人夫拍咀戲都係第一次，自己唔係咁好意思，因為識佢太太，個心覺得死喇﹗拍完後助手都有傳俾謝安琪睇，我哋兩個都好專業。好在當時阿聰冇留鬚，比較舒服啲。」詩雅話其中一場戲，講張繼聰被一隻螃蟹鉗住腳趾，阿聰大嗌好痛，詩雅話：「我話隻蟹咁細點會痛得咁誇張，自己仲攞隻手去試，點知真係好痛。」