女子組合SuperGirls真係沒有一刻停止過，講咩？走光囉！隊長Aka舊年著熱褲勁歌熱舞，點知就疑似走光，Heidi前排就走甩砵仔糕。到今日佢哋喺旺角出席一個飲食業安全活動，Aka著晒長褲都一樣出事。佢哋出場表演新歌《鎂光燈下》勁跳勁扭，點知Aka條工人褲吊帶就鬆咗一邊扣，佢之愈跳就愈甩，條褲又愈跌愈低，好彩最後都冇出事，係個肚仔同大家打個招呼啫，小心凍親呀！

至於今日條裙短到冇人有嘅岑日嘉，就有讀者報料話佢同鄭俊宏齊齊放狗，今日佢就回應，話同阿Fred、佢家人仲有吳若希一齊去，大家只係普通朋友，自己就只得廿歲，唔諗拍拖住喎。