澳門特首同香港一樣，5年一屆任期，只可連任一次，而現任特首崔世安09年上任、2014年連任，換言之今年卸任。咁新一任澳門特首係邊位？雖然話係400人小圈子選舉，但主要都係阿爺欽點，8月底就選完，目前大熱包括身兼全國人大常委嘅立法會主席賀一誠，佢去年北京兩會期間回應係咪參選仲話未知道；同年底再被追問相關問題就話唔回應假設性問題，直到今日喺立法會傳媒午宴後被追問參選意向時，正式表態話會積極考慮，62歲嘅佢自稱自己年紀大，「（但）唔怕入廚房，最緊要自己識唔識煮餸」，原來6字頭都係好嘢嚟㗎噃！

睇返賀一誠背景，確實根正苗紅，爹哋賀田係愛國商人，祖籍浙江嘅賀一誠1992年喺浙江大學讀機電同經濟，出任浙江省政協委員、常委時據聞同時任浙江省委書記、現任國家主席習近平有交集，難怪會成熱門。賀一誠曾任澳門行會成員，09年循工商金融界別晉身立法會，2013年做埋主席。

有澳門政界花生友話，賀一誠年初開始不斷放風話中央揀定自己，似乎都想製造成既定事實，但世事點會咁簡單？據知屬「紅三代」嘅經濟財政司司長梁維特都有意出選，有傳較賀一誠年輕5歲嘅梁獲崔世安背後力撐，仲好識公關戰，2017年天鴿襲澳時，仲被影到喺社區清理倒塌樹木添。而由於梁維特熟悉經濟，喺中美貿易戰下，無疑係一大優勢。咁啱喎，澳門新任中聯辦主任傅自應，都係財經體系㗎。

而如果賀一誠選特首，就要辭任立法會主席，此情況下崔世安兩兄弟就會有半年時間，行政、立法都管晒，因為崔世昌依家係立法會副主席，賀一誠辭任後，預料頂上做主席，屆時崔家，真正統領澳門。

澳門政府日前就公佈咗會喺6月16日舉行選委會選舉，到時會選出400個選委，負責推選出澳門第5屆特首。根據澳門法例，喺選委選出至少60日之後嘅周日，就可以舉行新一屆特首選舉，換言之最快今年8月中就可以知特首之位花落誰家喇！

澳門罕有的民主派立法會議員蘇嘉豪都喺Facebook論及事件，佢回應賀一誠係咪澳門人信賴嘅人選時指，「幾乎無法令人相信，任何產生自小圈子選舉的領導者，有義務謀求最大的公眾利益，以及為了城市長遠發展，在私人利益面前敞開心胸、挺起腰骨」，又話：「Trusted man（值得信賴者）和Yes man（惟命是從者）只是一線之差，中間差在一套良好的政治制度。」

10萬蚊 100人分！
星期一至五晚上10點半
《動腦Q》Let's Q the money！
http://bit.ly/2QW8LcI