近年攻陷至少5條屋邨的「韓國」健康中心，大受長者街坊歡迎，有公公婆婆更日日風雨不改定時到場打躉，邨內對健康中心的評價則十分兩極，有人為忠實擁躉，有人則大呻搵笨。

「日日都嚟呀！」一名在深水埗麗閣邨分店的師奶熟客自言已光顧了年半，深信按摩床和其他儀器為她解決了肩頸背痛問題，更直認購買了多粒托瑪琳石和石製枕頭，手上亦帶有托瑪琳石手鏈，「蒸魚都拎埋啲石一齊蒸，會甜啲；啲水又一齊浸，唔使洗（石頭）。」她深信石頭有神奇功效：「如果腸胃唔好，擺啲石放上個肚就會好。」至於花了多少錢？家人是否知情？她就不願透露，但承認家人反對她繼續購買產品。

深水埗區街坊梁先生就後悔花費鉅款購買產品，「每次去都會問你做完有冇好啲，問問下好似真係好啲。」起初梁先生僅買了手鏈等飾物，其後難抵職員多次落力游說，最終花了1萬多元購買按摩床，使用兩個多月後依然無效，「之後就覺得係心理作用囉，咁貴買張床返嚟，我上淘寶睇一模一樣都唔使(咁貴)啦。」

另有邨內婆婆則堅持不會落搭：「邊有咁著數！開間店畀你免費咩，一定會叫你買乜買物。」曾聽聞有街坊因腳腫到中心瞓床，試用兩個月後沒有購買任何產品，最終被職員趕走「叫佢唔好再嚟」！

你敢爆，我敢獎！ 即Call《蘋果》24小時爆相爆片熱線 ：63836568