「同阿媽去飲茶」。是不少仔女的母親節指定節目,不過對做點心師傅的辛勞媽媽羅鄧敬來說,一籠籠熱騰騰的蝦餃燒賣,統統有血有汗。「我哋做飲食業嘅,母親節一定特別忙,試過放咗工,嗰仔話請我食飯慶祝,坐喺度已經瞓着,攰到無晒胃口」。3時半下午茶時間,開了12小時工的她,早已疲態畢露。
「為囗奔馳,無辦法。有啲議員話女人做嘢買花戴,一定唔係講我,我做嘢真係要養家」。工運唱片《野火》,其中有首歌叫《辛酸》,據說歌詞是以敬姐為藍本。家住元朗,工作的酒樓在炮台山,每日凌晨兩點半起床,四時開工,工作12至14小時,回家再煮飯然後睡覺,每日如是。
做了點心師傅13年,就因為工時長,與丈夫聚少離多,離婚收場。「入行時家姐8歲,個仔6歲,送唔到返學,又接唔到佢放學」。工時長賠上婚姻,卻又因成了單親媽媽,一份晨昏顛倒的工作,變得更加重要,可謂諷刺。可幸的是,貧苦家庭,沒甚麼物質條件,卻總培養出孝順顧家的孩子。
「真係捱到週身病,佢哋兩個都知媽咪辛苦,大女仲讀緊書,一星期做3日兼職,自己賺到零用錢交到學費已經好好;細仔依家讀IVE,見到我放工好攰,成日搶住做家務,有時又主動下廚,煮嘢一齊食,佢哋顧得掂自己,其實已經好開心」。如何慶祝母親節?「最好等我放假嗰日先啦,做咁多個鐘,直係攰到食龍肉都無味」。敬姐說。
記者:呂麗嬋