網友聲討「白鴿眼」職員 「賣CHANEL的惡魔」
海港城CHANEL上演《穿Prada的惡魔》續集之《賣CHANEL的惡魔》,BeautyExchange吹水廣場網民Karen公開訴苦:「激氣!畀海港城CHANELBA(美容顧問)寸!」BA被指白鴿眼,向幫襯不多的顧客冷嘲熱諷,網民得悉,群起聲討。
「我一向有去CHANEL買嘢,不嬲都去又一城,BA都好好禮貌。今日(9月20日)行過海港城,見到CHANEL就入去買咗$1,110嘢,準備做禮物送畀人。我問個BA有冇盒可以包好,佢哋商量咗一陣就話:『要買夠$1,800先有盒噃,你買咁少,冇噃!』」
Karen惟有要求BA用花紙包:「於是,兩個BA好忙咁包嘢,個女BA同個男BA就喺度吹水,大聲講:『頭先個客買咗成萬蚊,又有禮貌;𠵱家啲人又買得少,又冇禮貌!』個BA畀氣人受,真係激氣,以後我唔會再去呢間CHANEL!」
留言一出,網界姊妹紛紛站起來。CC說:「嗰間啲BA係好差,我上次想買EyeCream,問佢又唔答,問多兩句就面黑,咁咪唔喺嗰度買囉。」MicTse更曾報復:「係呀!呢間BA好乞人憎,我老細係member,我幫佢去換嘢,佢哋狗眼看人低,覺得我冇錢。把鬼火!跟住我又好壞心腸咁,揀完試完晒一大堆嘢,問到佢頂我唔順之後,臨畀錢嗰一刻,我話:『唔好意思,我唔記得帶銀包。』
Karen其後以電話兼電郵向該分店經理投訴,對方表示,無規定要買$1,800以上才有禮盒,並稱如果投訴成立,BA可能須接受再培訓。」
Karen表示滿意CHANEL該分店經理的答覆。本報致電海港城CHANEL,接線的女職員則指自己「呢幾日冇返工,唔清楚件事。」着記者留下電話號碼,由公司辦事處回應。
海港城CHANEL分店經理回應指,無規定顧客要買滿$1800貨品才有禮盒。